Cacho los riba caya ta un peliger diario pa trahadornan di Post Aruba NV

Un di e instancianan cu sigur ta apoya e ley nobo di cacho ta Post Aruba NV. Cachonan los riba caya ta un di e obstaculonan mas grandi pa e repartidornan di carta pa haci nan trabou na un manera eficiente y sigur.
Pa e motibo aki, Post Aruba NV a acepta e reto pa parti 30.000 foyeto, cubriendo asina tur cas riba nos isla, pa yuda Plataforma Ley Di Cacho informa y conscientisa tur ciudadano tocante e ley nobo di cacho cu lo drenta na vigor dia 1 di januari 2015.

Pa varios aña caba Post Aruba NV ta haci uso di scooters pa parti carta. Scooters ta haci e trabou di e partidornan di carta mas facil y liher, pero cachonan los riba caya of cachonan den cura cu ta yega cerca di e postbus ta un peliger pa e trahadornan aki.
Post Aruba NV tin un lista grandi di adres y bario cu ta crese diariamente pa loke ta trata kehonan di e trahadornan cu ta haya dificultad y ta core peliger ora di parti carta pa via di cachonan cu no ta den cura na un manera adecua.

Tur dia, trahadornan di Post Aruba NV ta keda ataca pa cacho ora nan ta core den bario pa haci nan trabou. E riesgo pa haya mordi of pa cay for di nan scooter ora nan purba desvia pa cacho ta grandi. Carson cu buraco ora di yega oficina bek a bira algo normal pa algun trahador. Cacho cu kier morde e rubber di e scooter, lagando trahador cu flat tire y ainda monton di carta pa parti tambe a bira parti di e trabou.

Tin biaha nan no por parti carta na cierto adres of bario pasobra tin cacho mara na e post bus of los riba caya cual no ta laga e trahadornan ni drenta den e caya.
E problematica aki no solamente ta un peliger pa e trahadornan di Post Aruba NV of cualkier otro persona cu pasa den e cayanan aki. Esaki ta sin menciona con algún cacho ta haya nan mes den peliger cu traffico paso cu ta core tras di e scooter.
Plataforma Ley di cacho kier a gradici Post Aruba NV pa nan cooperacion asina tur persona ta na altura cu mester trece un cambio den e manera con nos ta cria nos cachonan. Cada cas na Aruba lo ricibi un foyeto cu informacion tocante e ley nobo di cacho na papiamento y ingles. Cu esaki, henter comunidad lo keda informa pa asina tuma accion y no haya nan mes cu e consecuencianan cu e ley aki por trese. Pa esnan cu tin cacho na cas lo ta importante pa pasa dor di e puntonan cu ta scirbi pa asina por sa kico ta speranan prome di januari. Durante e simannan aki bo lo mester haya bo foyeto na cas, esey si e cachonan di bario ta permiti esaki!